Home Opinions ✝OKUHABURA KW’OMUREEBEREZI OMU BY’AKARUURU

✝OKUHABURA KW’OMUREEBEREZI OMU BY’AKARUURU

by Countryside Reports

Abakundwa,

Tumazire omwanya nitushaba ngu Ruhanga agume abangire omukono gwe, obunaku bw’akaruuru buhikye, kateerwe kandi kahwe gye. Nitusiima Ruhanga okureeba ngu akitukwatiire, mbwenu haaburayo eshaaha bushaaha okeegaranjura aha iteerero ryawe (polling station), kuteera akaruuru k’encuro y’okubanza (primaries), ahabw’okutoorana abebembezi baitu. 

Mwebare mwena abetsimbire ahabw’okutamu amaani, obwire, n’ebintu murikushaba abatuuze obushagiki. Buzima murwaine mashaija, okukira munonga ahabw’obunaku obu obwa COVID-19. Ruhanga asiimwe okibarinzire! Mbwenu obunaku bwahika, nyencakare bwaza kuseesera okwehenenga, obwo tutegyeereize eki Rugaba araacwemu.

Ninshaba ngu omuri byona mutwaze gye. Omuri byona, mwijukye ngu hariho nyencakare! 

A. ABETSIMBIRE 

Ahari iwe oyetsimbire, ninkuhabura ebi:

1. Oijukye ngu obutegyeki n’obwebembezi nibiheebwa Ruhanga (Rom. 13:1-2). Ensi egi n’eye, kandi tihariho oba omutegyeki Ruhanga atakiikiriize. Nangu noozaho omu buryo obu turikugira ngu tibwo aba Ruhanga aba akiikiriize, ahabw’ enshonga n’ebigyendererwa ebye. Okozire eki orikubaasa, ebyatsigara birekyere Mukama.

2. Yetantare emicwe mibi. Oyehare ebigambo nari ebikorwa ebirikuhutaaza, kandi ohane abahagizi baawe barekye kutwariza bariya kubi. Nk’oku nagamba aha ruguru, oijukye ngu hariyo nyencakare! Kwata akanwa….tsigir’ enda. Akaruuru aka ti muheru gw’ensi. Okufukaana ti kibi, kwonka mutahendana!

3. Guma oyeteekatekyeire kimwe ahari bibiri: okusinga nari okusingwa. Eki nikiija kukuhwera kumanya kare oku oraije kutwaza kimwe ahari ebyo kyahaza kubaho. Ku oraasingye, osiime Ruhanga. Ojaguze, oshemererwe, osiime abakukwatsize, kwonka oteraata okeetunguura – ahakuba orugyendo rukiikaire! 

Kandi ku byakuba bitarabiremu, oteehwa amatsiko, ensi neeba etaahwaho, noobaasa kukora ekindi. Ku harasingye obaire ariho, biri Ruhanga ayenzire ngu agumizemu. Obundi iwe obunaku bwawe tibukahikire, nari eky’obwebembezi obwo Ruhanga tarakikuteekateekyeire.

Ku harasingye omusya, iwe obaire ariho huumura. Okozire ogwawe, akati kakwatse ondiijo, omushabire agumizemu. Hoona nabwo noomanya ngu empinduka ebaho, ahakuba naiwe oine ou wagiire omu bigyere – ou wasingire buriya!

4. Mukama ku areikirize abantu baaba niiwe baatoorana omu ncuro egi eya primaries, gumizamu nooshaba kandi nookoresa amaani kuraba aha kagyegyena akandi. Gumya obuteeka bwawe. 

Omanye ngu abaraabe batakutereire karuuru boona tibarikukwanga. Iwe ku waakuba ori iwe, okateereire buri omwe?

B. ABASHAGIKI KANDI ABATEEZI B’AKARUURU

Ahari iwe omuhagizi kandi omuteezi w’akaruuru, yebare munonga rukundo n’obushagiki ebi oyorekire aha muntu waawe ogwo, n’okumwendeza obusinguzi. Mbwenu ninkuhabura nti:

a. Obangire kandi oshabire omuntu waawe, kwonka otamuhenda. Hariho omwe aha betsimbire owanteerera esimu omu kasheeshe omu agumize ati Bishop onshabire esente zambeera sente! Buri omwe nayenda sente, twagwerwa akagwe, eki kyarenga!” 

Bantu ‘mwe, oburuuru bw’okugura nibuza kututa omu kindi! Esente nizetengwa kukora emirimo y’oburuuru, omu kubangira abantu omu by’amagara gaabo n’entunguuka, kwonka eky’okugura, okutugira abantu ngu bakuhe akaruuru, kirimu akabi. Yerinde, esente zitakukoresa eki Ruhanga atarikwenda!

Ohuriire ebigambo by’abetsimbire boona. Hati noobamanya, n’abandi noomanya emikorere n’emitwarize yaabo. Shaba Mukama, ocwemu omu mutima gwawe ou orateerere.

b. Teerera ogwo iwe ou orikureeba ngu niwe mwebembezi ohikire ahabw’entebe egyo.

c. Oteikiriza kuguza obugabe bwawe bw’okutoorana. Esente nari obwoba bitahindura ebiteekateeko byawe.

Mwena amamanzi gaitu abeetsimbire nimbatengyera obuhanguzi! Kwonka mwena ti mukaaba b’okubanza. Mbwenu ninshaba ngu kuruga omuriiwe, Mukama atukorese tutoorane abebembezi abahikire!

Mukama abaheereze omugisha abarinde, abaakize omushana gw’amaisho ge, kandi abaheereze obusingye!

Ka tutegyeereze n’ekihika kubatabaarutsya!

Rt. Rev. Johnson Twinomujuni

Omureeberezi wa West Ankole Dayosiisi

Share this article

You may also like

Leave a Comment