Home Opinions Ohandiikire enaama ye, nk’ozaire, aba ayeshuubwire

Ohandiikire enaama ye, nk’ozaire, aba ayeshuubwire

by Countryside Reports

N’ebya Ahabwe Abraham

Nayebare Festo Karwemera (omugyenzi) okubeera Abanyankore n’Abakiga ekibaaju omu kurinda n’okushemeza orurimi rwaitu. Manya ekitara kikutungire okirwanaho kandi okirwanirira ahakuba kukihwaho naiwe ohwaho. Eshi Karwemera akatuteeraho ekitara ky’Orurimi n’eby’obuzaarwa. Ebya ira, ebya biso na biso, akabirundaana, yaabicencura, yaabiihamu omucuucu n’esingo, yaabituteera omu bitara. Omuri ebyo bitara by’obwengye bugyegyeine gye, ebitabo bi yahaandiikire n’ebigano bi yarindiire omu maraka; omwo nimwo tuza, tukashaka eky’okututunga, itwe n’abaitu; aba hati n’aba nyentsya.

Omu bitara bye akaturindiramu embibo y’okukanyisa itungo ry’orurimi n’eby’obuzaarwa bwaitu. Nkabaasibwaki embibo egyo tugirinda nk’abarinda ebi baaragirwe! Ahakuba n’obu araabe yaataireho eka, hoona ebigambo bye by’obwengye abiragire boona abarikukunda bakesiimisa orurimi rwabo. Nangwa n’okukiraho, embibo egyo twezirikye kugibiba omu mitima yaitu, omu baana n’omuri baijukuru baitu; eimukye n’eigyesha ry’akakumi n’amagana, ebitara bikanye, bihaagye, bishandaare.

Omugyenzi Festo Karwemera. Ekishushani n’eky’eibikiro

Reeba abeevugi oku baarikugyesha omweru n’omuragara aha mbibo egyo!

Reeba abahandiiki oku barikurya n’amairu aha kiihuro kyayo!

Reeba abeeshongozi oku barikunuriiriza akarungi kaayo nk’ak’obwoki!

Reeba ab’emizaano oku barikuteera entama aha kikopo ky’omufunguro gwayo!

Reeba abeegyesa oku barikugabuurira abeegi aha njoga yaayo erikusheneneka!

Reeba omu maka nibakomba aha kitori ky’omwonyo gwayo, nikibateera eiriho ry’okunywa aha nshuro yaayo obutahaaga!

Reeba enganda n’amahanga oku garikugishakaho eby’okutonda ebigambo by’okubatunga!

Reeba abarikubatiza oku baaza kwesiimisa amaziina g’oburugo bwaitu, bakahamya emizi y’abato omu kirari ekyarinzire ababazaire!  

Reeba oku amaramizo n’amaramuriro gaagarura orurimi rwaitu aha kitiinisa kyarwo!

Obwo, eihanga ryaitu rikaakira obumuga bw’okwegamira orurimi rw’entiizano orutaine mizi. Obwo, naitwe tukaarangaanwa, twetwa Baabaigaruraho, abahimbuura ebyabo batabihemukyeho!

Mbwenu Ruhanga, owahenzire Karwemera n’omutwaro gw’okurinda orurimi n’eby’obuzaarwa byaitu, amaisho gye akagamurikira, gakeeya kandi gakafukura amaziba gaabyo agaabaire gaigiire, reero gakaata enshuro y’amaizi g’itungo ryabyo; naiwe naakagukuhenze! Naakakuteere obwira bw’okutangiriza aha nshuro egyo, okaihaho amaizi g’okwozya okashemeza engamba yaawe n’ey’abaawe! Naakakuhe obwengye n’oburyo bw’okuganyuukisa; ebyeshongoro n’ebyevugo, ebihimbo n’ebizino, ebihandiiko n’ebigano, eby’abato n’ebyabakuru. Naakakumurikire ekirari ky’amaziba agandi nk’ago g’okuhunduuza okanywaisa eihanga!

Omuhandiiki n’owabaireho Edita w’Orumuri kandi enkunzi y’obuhangwa bwa Nkore

Tuhikirire aha simu: 0782711457/0706139795

Share this article

You may also like

Leave a Comment